ग्लासात ‘डर्टी वाॅटर’
|
|
- राजेश प्रायकर - सकाळ वृत्तसेवा
|
|
शहरातील घाण वाहून नेणाऱ्या नागनदीला पावनगाव येथे पिवळी नदी मिळते. अगदी शहराच्याच बाजूला हा संगम आहे. शहरापासून ३१ किलोमीटर अंतरावर शिवनी गाव आहे. येथे हिंगण्याकडून वाहत येणाऱ्या पोरा नदीतील घाण नागनदीच्या घाणीत भर घालते. हिंगण्याकडून येणारी पोरा नदी बेसा, हुडकेश्‍वर, नरसाळा या आता शहराचाच भाग झालेल्या परिसरातून घाण वाहून नेते. विहीरगाव, तरोडी बुजुर्ग, खेडी आदी गावांच्या शिवेतून वाहणाऱ्या या नदीने या गावातील पाणी दूषित केले आहे. शिवनी येथे पोरा व नागनदीचा संगम होत असल्याने दोन नद्यांच्या घाणीचा ‘डबल डोस’ या गावासह झरप, भानेवाडा आदी गावांना मिळत आहे. पुढे शहरापासून ५४ किलोमीटर अंतरावर सावंगी मोठी येथे नागनदी कन्हान नदीला मिळते. काही अंतरापर्यंत नाग व कन्हानचे पाणी समांतर वाहते. परंतु, नागनदीचे पाणी कन्हानमध्ये शिरल्यानंतर कन्हानही काळ्या पाण्याचा नालाच दिसून येत आहे. कुही तालुक्‍यातील मोठी सावंगी, छोटी सावंगी, चापेगडी, मोहगाव, आगरगाव, चिचघाटलाही काळ्या पाण्याने कवेत घेतले.
शिवनी परिसरात गॅस्ट्रो कायम
शिवनी येथील संगम परिसरात घनदाट जंगल असल्याने अनेक वर्षांपासून शिवनी, झरप व भानखेड्यातील नागरिकांनी फिरकूनही पाहिले नाही. अशावेळी या दूषित पाण्याची दखल घ्यायला प्रशासन येथे पोहोचण्याची कल्पनाही करणे गैर आहे. या परिसरातील बोअरवेलमधून येणाऱ्या पाण्यातून विविध आजारच नागरिकांच्या घरात पोहोचत आहे. गॅस्ट्रो, डायरियाचे रुग्ण या परिसरात दररोज दिसून येतात.
